Adh-Dhariyat
Përkthimi: Sherif Ahmeti
Për erërat që ngrehin dheun dhe shpërndajnë. 51:1
Për retë që e bartin shiun e rëndë. 51:2
Për anijet që lundrojnë lehtë. 51:3
Për engjëjt që bëjnë ndarjen e çështjeve. 51:4
S’ka dyshim se ajo qe u premtohet është e vërtetë e sigurt. 51:5
Dhe se shpërblimi (gjykimi për vepra) do të ndodhë pa tjetër. 51:6
Për qiellin plot rrugë. 51:7
Ju gjendeni në nje thënie kontradiktore, 51:8
Nga ai (besimi) zbrapset ai që ishte zmbrapsur. 51:9
Mallkuar qofshin gënjeshtarët! 51:10
Ata të cilët janë gafilë në injorancë (në verbëri, në padituri). 51:11
E pyesin: “Kur është dita e gjykimit?” 51:12
Dita kur ata digjen në zjarr. 51:13
Përjetonie dënimin tuaj, ky është ai që kërkonit t’ju shpejtohet. 51:14
Të devotshmit janë në kopshte e burime. 51:15
Të kënaqur se kanë shtënë në dorë atë që u dha Zoti i tyre, ata edhe më parë (në dynja) ishin mirëbërës. 51:16
Ata qenë të cilët pak flinin natën. 51:17
Dhe në syfyr (kah mbarimi i natës) ata kërkonin falje për mëkata. 51:18
Dhe në pasurinë e tyre kishin përcaktuar të drejtë për lypësin dhe për të ngratin (që ka nevojë por nuk lyp). 51:19
Edhe në tokë ka argumente për ata të bindurit. 51:20
Po edhe në veten tuaj. A nuk jeni kah e shihni? 51:21
E në qiell është furnizimi juaj dhe ajo që ju premtohet. 51:22
Pasha Zotin e qiellit e të tokës, kjo është një e vërtetë, ashtu siç është se ju flisni. 51:23
A ke arritur të dëgjosh ti për rrëfimin e musafirëve të ndershëm të Ibrahimit? 51:24
Kur patën hyrë te Ai dhe thanë: “Të përshendesin me paqe!” (E më vete tha): “Njerëz të panjohur!” 51:25
Dhe ai pa u vërejtur shkoi te familja e vet dhe solli një viç të majmë të pjekur. 51:26
Atë ua afroi atyre e tha: “Përse nuk po hani?” 51:27
Dhe ndjeu njëfarë frike prej atyre, po ata thanë: “Mos kij frikë!” Mandej i dhanë myzhde për një djalë të dijshëm. 51:28
E gruaja e tij nisi të bërtasë e ri ra shuplakë fyyrës së vet e tha: “Unë jam një plakë që nuk lind!” 51:29
Ata (engjëjt) thanë: “Keshtu ka thënë Zoti yt, e Ai është i urti, i gjithedijshmi”. 51:30
Ai (Ibrahimi) tha: “E ç’është puna juaj, o ju të dërguar?” 51:31
Ata thanë: “Ne jemi të dërguar te një popull kriminel!” 51:32
Që të hedhim mbi ta gurë nga balta (e pjekur)! 51:33
(gurë) Të shënuar te Zoti yt, për ata që i kaluan kufijtë (në mëkate). 51:34
Dhe kush ishte aty nga besimtarët, Ne i nxorrëm (i larguam). 51:35
Po nuk gjetëm aty pos një shtëpie myslimane. 51:36
Dhe Ne kemi lënë aty shenjë dënimit të hidhur. 51:37
(Kemi lënë shenjë) Edhe në Musain kur Ne e dërguam te faraoni me fakte të forta. 51:38
E ai, me tërë anën (fuqinë) e vet, ia ktheu shpinën dhe tha: “Është magjistar, ose është i çmendur!” 51:39
E Ne e kapëm atë dhe ushtrinë e tij dhe e hodhëm në det, dhe ai e bëri veten të jetë i sharë. 51:40
Edhe në Adin (kemi lënë shenjë) kur Ne lëshuam kundër tyre erën rrënuese, 51:41
E cila nuk la send pa e shënderruar në mbeturinë. 51:42
Edhe Themudin kur atyre iu pat thënë: kënaquni deri në një kohë. 51:43
E ata nga kryelartësia nuk respektuan urdhërin e Zotit të tyre, andaj i përfshiu rrufeja me krismë, e ata e shihnin. 51:44
Dhe nuk mundën as të ngriten e as t’i kundërvihen. 51:45
Edhe popullin e Nuhut (e dënuam) që ishte më parë. Ai ishte një popull i prishur. 51:46
Ne, me forcën tonë e ngritëm qiellin dhe Ne e zgjërojmë atë. 51:47
Edhe tokën Ne e kemi shtruar, sa shtrues të mirë jemi. 51:48
Dhe Ne krijuam prej çdo sendi dy lloje (mashkull e femër) që ju të përkujtoni (madhështnë e Zotit). 51:49
Pra, ikni e mbështetuni te All-llahu, unë prej Tij jam një qortues i hapët. 51:50
E mos i shoqëroni All-llahut edhe ndonjë zot tjetër, edhe për këtë unë jam i dërguar prej Tij që t’ju tërheqë haptazi vërejtjen. 51:51
Ja, ashtu pra, edhe atyre që ishin më parë nuk u erdhi i dëguar e që nuk i thanë: “Është magjistar ose është i çmendur!” 51:52
A mos e porositën njëri-tjetrin me këtë? Jo, por ata janë popull renegat. 51:53
Andaj ti larohu prej tyre, ti nuk je i qoruar. 51:54
Vazhdo me keshillë, sepse këshilla besimtarëve u bën dobi. 51:55
Unë nuk i krijova xhinët dhe njerëzit për tjetër pos që të më adhurojnë. 51:56
Unë nuk kërkoj prej tyre ndonjë furnizim e as dëshiroj të më ushqejnë ata. 51:57
All-llahu është furnizues i madh, Ai fuqiforti. 51:58
S’ka dyshim se atyre që bënë mizori u përket dënimi si pjesa e dënimit të shokëve të tyre, andaj, të mos e kërkojnë shpejtimin e tij. 51:59
Të mjerët ata që nuk besuan për atë ditën e tyre të premtuar! 51:60